Генэрал Полька: Адзінага фронту супраць Іслямскай дзяржавы не існуе

Польшча ўжо даўно ўдзельнічае ў глябальнай антытэрарыстычнай кааліцыі, - кажа былы камандзір польскай спэцадзінкі GROM генэрал Роман Полька. На яго думку, глабальны тэрарызм можна пераадолець, калі яго праціўнікі будуць працаваць разам.

Генэрал станоўча ацаніў заклік прэзыдэнта ЗША Барака Абамы стварыць кааліцыю для барацьбы з Іслямскай дзяржавай. Ён нагадаў, што Польшча ўжо даўно супрацоўнічае ў антытэрарыстычнай кааліцыі супраць талібаў і Аль-Каіды. Па словах генэрала, Варшава павінна накіраваць на барацьбу з тэрарыстамі спэцыяльныя падразьдзяленьні.

Гэн Р. Полька: Польшча павінна адправіць тое, што ў яе найлепшае: спэцпадразьдзяленьні. Амэрыканцы й афганцы ўжо зьвярнуліся да спэцадзінкі з Любліньца з просьбай праводзіць вучэньні для мясцовых праваахоўных сіл. І я думаю, што патрэбная падтрымка ў такім вось выглядзе.

Генэрал Полька лічыць, што ў цяперашні час няма агульнага фронту супраць Іслямскай дзяржавы, які атрымалася стварыць супраць талібаў. Пануе хаос - дзеяньні заходніх краін не ўзгодненыя, а Саудаўская Арабія і Іран маюць уласныя інтарэсы.

Генэрал Полька падкрэсьліў, што для эфэктыўнай барацьбы з Іслямскай дзяржавай неабходная падтрымка для мясцовых сіл, такіх, як ірацкая армія. Варта таксама перакрыць крыніцы фінансаваньня тэрарыстаў, таму што ў цяперашні час яны свабодна гандлююцца нафтай і наркотыкамі. Генэрал выказаў меркаваньне, што барацьба супраць джыхадыстаў не патрабуе ўмяшаньня на сушы. Дастаткова рэчавай і выведвальнай падтрымкі для ірацкай арміі і іншых сіл, якія змагаюцца супраць тэрарыстаў.

яс