Старшыню Эўрапейскай рады дапыталі польскія пракуроры

Былы прэмʼер-міністар Польшчы, актуальны старшыня Эўрапейскай рады Дональд Туск сёньня зьявіўся ў варшаўскую пракуратуру для таго, каб даць паказаньні па справе аб невыкананьні польскімі дзяржслужачымі сваіх абавязкаў у пытаньні правядзеньня ўскрыцьця цел ахвяр смаленскай авіякатастрофы.

Нагадаем, 10 красавіка 2010 года ў выніку крушэньня польскага ўрадавага самалёту пад Смаленскам загінулі 96 чалавек, у тым ліку тагачасны прэзыдэнт Польшчы Лех Качыньскі з жонкай.

Адносна сьледзтва пракуратура паведаміла, што «яно тычыцца, у прыватнасьці, экс-пракурораў Варшаўскай акруговай вайсковай пракуратуры». На думку сьледчых, падчас ідэнтыфікацыі цел было дапушчана шмат памылак. Нагадаем, у выніку праведзеных эксгумацый было выяўлена, што ў васьмі выпадках целы ахвяр пераблытаныя, а ў 13-і трунах былі парэшткі іншых загінулых.

Будучы прэм’ерам, Дональд Туск адказваў за дзейнасьць спэцслужбаў, таму пракуратура яго дапытвае ў якасьці сьведка. Аднак апазыцыйная партыя «Грамадзянская плятформа», членам якой быў Туск, упэўненая, што гэта палітычная помста з боку актуальна кіруючай кансэрватыўнай партыі «Права й справядлівасьць» (ПіС).

У сваю чаргу прэс-сакратар ПіС Бэата Мазурэк запэўнівае, што ніякай помсты няма. Паводле яе слоў, перад правасудзьдзем усе павінны быць роўныя, а Туск павінен разьвеяць усе сумневы, адказаць на ўсе пытаньні праваахоўных органаў і не хавацца за імунітэтам.

Першапачаткова допыт Дональда Туска быў заплянаваны на 5 ліпеня, аднак ён ня змог прыбыць у пракуратуру ў сувязі з выкананьнем абавязкаў галавы Эўрапейскай рады.

вс