Logo Polskiego Radia
Print

Польшча й Беларусь падпісалі пагадненьне аб сацыяльным забесьпячэньні (ФОТА)

PR dla Zagranicy
Valery Sauko 13.02.2019 21:42
  • інтэрвію-1.mp3
  • інтэрвію-2.mp3
  • інтэрвію-3.mp3
Пагадненьне тычыцца грамадзян Беларусі, якія жывуць у Польшчы, і рэгулюе пытаньні пэнсій, пэнсійнага стажу, выплат у сувязі з захворваньнямі й шэраг іншых.
Старшыня Савету Рэспублікі Нацыянальнага сходу Беларусі Міхаіл МясьніковічСтаршыня Савету Рэспублікі Нацыянальнага сходу Беларусі Міхаіл Мясьніковічфота: прэс-служба Пасольства Беларусі ў Польшчы

Зь візытам у Польшчы знаходзіцца старшыня Савету Рэспублікі Нацыянальнага сходу Беларусі Міхаіл Мясьніковіч.

Высокапастаўлены беларускі чыноўнік правёў шэраг важных сустрэчаў, у прыватнасьці, сустрэўся з прэзыдэнтам Польшчы Анджэям Дудам, прэм’ер-міністрам Матэвушам Маравецкім, старшынямі Сэйму й Сэнату Марэкам Кухціньскім і Станіславам Карчэўскім, кіраўнікамі міністэрстваў, у тым ліку зь міністрам замежных спраў Яцэкам Чапутовічам.

Падчас перамоваў былі абмеркаваныя пытаньні гандлёва-эканамічнага й інвэстыцыйнага супрацоўніцтва, супрацы ў галіне адукацыі, навукі, культуры й іншых сфэрах.

Акрамя таго, было падпісанае пагадненьне паміж краінамі аб сацыяльным забесьпячэньні. Міхаіл Мясьніковіч таксама наведаў Польскую акадэмію навук.

З Варшавы старшыня Савету Рэспублікі накіраваўся ў Беласток, дзе ў чацьвер сустрэнецца з прадстаўнікамі беларускай нацыянальнай меншасьці ў Польшчы, кіраўніцтвам Падляскага ваяводзтва ды наведае Беластоцкі мэдыцынскі ўнівэрсытэт.

/

У канцы візыту ў Варшаве Міхаіл Мясьніковіч знайшоў у напружаным графіку паездкі час для эксклюзіўнага інтэрвію для Польскага радыё.

Польскае радыё: Міхаіл Уладзіміравіч! Вы працяглы час былі зьвязаныя з Нацыянальнай акадэміяй навук Беларусі. Падчас візыту вы сустракалі зь кіраўніцтвам Польскай акадэміі навук. У якіх галінах маглі б супрацоўнічаць і якімі сфэрамі супрацы зацікаўленыя згаданыя навуковыя ўстановы дзьвюх краін?

Міхаіл Мясьніковіч: Мы дэталёва размаўлялі на розныя пытаньні, і я ўдзячны кіраўніцтву Польскай акадэміі навук, што мы дамовіліся абазначыць шэраг пытаньняў, якія будуць вырашацца сумесна навукоўцамі Беларусі й Польшчы. Гэта й біялёгія, гэта пытаньні, зьвязаныя з вэтэрынарыяй, гэта таксама пытаньні інфармацыйна-камунікацыйных тэхналёгій.

У нашым Парку высокіх тэхналёгій працуе шмат кампаніяй і з Амэрыкі, і з Чэхіі, і зь Германіі, але няма кампаній з польскімі каранямі. Гэта адзін з канкрэтных прыкладаў плянаў па супрацы. Мы таксама размаўлялі пра тое, яе актыўна ўдзельнічаць у навуковых праграмах Эўрапейскага Зьвязу, таму што і ў Беларусі, і ў Польшчы ёсьць кампэтэнтныя навукоўцы ў розных галінах. І я ўдзячны польскім навукоўцам, якія ведаюць, як адчыняюцца дзьверы ў Брусэлі й іншых высокіх эўрапейскіх інстанцыях, каб мы аб’яднанымі намаганьня вырашалі ня толькі пытаньні для беларускага й польскага бакоў, але й для навуковай супольнасьці ў цэлым.

/

Вы згадалі Парк высокіх тэхналёгій... Сапраўды, ёсьць беларускія кампаніі, якія добра вядомыя далёка па-за межамі краіны. Ці пытаньне, датычнае супрацы ў галіне высокіх тэхналёгій, закраналася падчас вашай сустрэчы зь міністрам прадпрымальніцтва й тэхналёгій Польшчы Ядвігай Эмілевіч?

Мы зь ёй даволі падрабязна разглядалі гэтыя пытаньні, таму што ў нашым тавараабароце больш чым 50% - гэта гандаль сыравіннымі таварамі: нафтапрадукты, лес, калійныя ўгнаеньні й гэтак далей. Мы канкрэтна размаўлялі пра супрацу ў высокатэхналягічных сфэрах. Для прыкладу, і ў нас, і ў польскага боку дастаткова высокія кампэтэнцыі ў хіміі й біялёгіі. Так, гаварылася пра стварэньне сумесных прадпрыемстваў па выпуску хімічных нітак і валокнаў, якія б былі канкурэнтназдольнымі як у нашых дзяржавах, так і ў Эўрапейскім Зьвязе ды ў сьвеце ў цэлым.

Мы гаварылі пра лекі, гаварылі пра вэтэрынарныя прэпараты, а таксама пра тонкі сынтэз біятэхналёгій. Мы павінны ня толькі глядзець на кампаніі, якія да нас прыходзяць, але й самі ствараць прадукцыю з высокай дададзенай вартасьцю. Гэта вельмі важна, таму што ў беларуска-польскім гандлі доля высокатэхналягічнай прадукцыі складае ўсяго 5-7%.

Мы таксама размаўлялі пра машынабудаваньне, таму што ў гэтай галіне й польскі, і беларускі бакі маюць высокія пазыцыі. І таму трэба агульнымі намаганьнямі ствараць сумесныя прадпрыемствы, якія будуць канкурэнтназдольнымі ў Эўропе й сьвеце.

/

Падчас вашага візыту было падпісанае беларуска-польскае пагадненьне аб сацыяльным забесьпячэньні. Каго згаданае пагадненьне датычыць, якія пытаньні рэгулюе й што дае грамадзянам дзьвюх краін?

Гэтае пагадненьне рыхтавалася не адзін год. Бакі вельмі важна разглядалі цэлы шэраг пытаньняў, таму што гэта тычыцца тысяч і тысяч звычайных людзей, якія прыяжджаюць з Польшчы ў Беларусь, але больш – зь Беларусі ў Польшчу, і якія вучацца ва ўнівэрсытэтах альбо працуюць. Пагадненьне рэгулюе пытаньні пэнсій, пэнсійнага стажу, выплат у сувязі з захворваньнямі, пытаньні маці й дзіцяці й шэраг іншых (...). Гэта вельмі важная дамоўленасьць, паколькі яна тычыцца звычайнага грамадзяніна.

Дзякуй за размову!

Размаўляў Валеры Саўко

Беларуская служба Польскага радыё дзякуе Пасольству Беларусі ў Польшчы за садзейнічаньне ў правядзеньні інтэрвію

слухайце далучаныя гукавыя файлы

Print
Copyright © Polskie Radio S.A Пра нас Кантакт