Пытаньне амэрыканскіх базаў у Польшчы будзе вырашанае неўзабаве

Супрацоўніцтва ў галіне бясьпекі было адной з галоўных тэмаў размовы прэзыдэнта Польшчы Анджэя Дуды й віцэ-прэзыдэнта ЗША Майка Пэнса ў Варшаве.

Пасьля яе заканчэньня кіраўнік Польшчы паведаміў, што ў бліжэйшы час можна чакаць рашэньня аб павелічэньні ваеннай прысутнасьці ЗША ў Польшчы. Анджэй Дуда не ўдакладніў аднак, ці гаворка ідзе пра стварэньне пастаяннай базы ЗША ў Польшчы.

„Спадзяюся, што нашыя сумесныя намаганьні па павелічэньні прысутнасьці арміі ЗША ў Польшчы прынясуць вынікі. Неўзабаве па гэтай справе будуць прыняты першыя канкрэтныя рашэньні”, - сказаў Дуда.

Нагадаем, Польшча ўжо некалькі месяцаў змагаецца за стварэньне на сваёй тэрыторыі пастаяннай базы амэрыканскіх войскаў.

Іншай тэмай сустрэчы Анджэя Дуды з Майкам Пэнсам было энэргетычнае супрацоўніцтва.

„Мы ўжо падпісалі шэраг кантрактаў на пастаўкі звадкаванага прыроднага газу ў наш тэрмінал у Сьвінауйсьці. На дадзены момант мы працуем над павелічэньнем магчымасьцяў гэтага тэрмінала”, - пераконваў польскі прэзыдэнт. Ён дадаў, што ў сувязі з гэтым плянуюцца чарговыя інвэстыцыі.

Падчас сустрэчы таксама абмяркоўваліся пытаньні дзелавога супрацоўніцтва паміж Польшчай і ЗША.

У сваю чаргу віцэ-прэзыдэнт ЗША Майк Пэнс сказаў, што адносіны паміж Злучанымі Штатамі Амэрыкі й Польшчай наймацнейшыя ў гісторыі.

„Польшча й Злучаныя Штаты Амэрыкі зьяўляюцца сябрамі, паколькі яны прытрымліваюцца адных і тыя ж каштоўнасьцей. У сваю чаргу ў сьвеце, які становіцца ўсё больш непрадказальным, наш саюз усё больш актыўным”, - сказаў Пэнс.

Нагадаем, віцэ-прэзыдэнт ЗША Майк Пэнс прыбыў у Польшчу на канфэрэнцыю па Блізкім Усходзе, якая ў сераду ўвечары пачалася ў Варшаве.

аз