Рымашэўскі спадзяецца на ўдзел лідараў БНК у маршы 15 сакавіка

Сустаршыня аргкамітэта па стварэньні партыі „Беларуская хрысьціянская дэмакратыя” (БХД) Віталь Рымашэўскі спадзяецца на ўдзел лідараў Беларускага нацыянальнага кангрэса (БНК) у заплянаваным на 15 сакавіка „Маршы недармаедаў”, паведамляе прэс-служба БХД.

„Пасьля абвяшчэньня падрыхтоўкі „Маршу недармаедаў” 15 сакавіка Мікалай Статкевіч і Ўладзімір Някляеў (гэтыя палітыкі разам з Яўгенам Афнагелем узначальваюць БНК. — БелаПАН.) абвясьцілі сваю акцыю 17 лютага, — адзначыў Рымашэўскі. — Нягледзячы на тое што гэта дзьве розныя акцыі і ў іх розныя арганізатары, у іх адна мэта. Сёньня ня важна, хто арганізатар. Важна выказваць салідарнасьць, калі мы хочам дасягнуць мэты. Толькі разам мы пераможам”.

Лідар хрысьціянскіх дэмакратаў 17 лютага ўдзельнічаў у арганізаваным БНК ў Менску „Маршы абураных беларусаў” — акцыі пратэсту супраць дэкрэта № 3 „Аб папярэджаньні сацыяльнага ўтрыманства” (так званы дэкрэт аб дармаедзтве), на якую выйшлі прыкладна тры тысячы чалавек са сталіцы й рэгіёнаў. Паводле слоў Рымашэўскага, сярод дэманстрантаў ён убачыў „шмат новых людзей”, якія „прыехалі выказаць сваё абурэньне й падзяліцца сваёй бядой” і ў цэлым „пакінулі вельмі добрае ўражаньне”.

„Марш недармаедаў” 15 сакавіка ў Менску арганізуюць Беларуская партыя левых „Справядлівы сьвет”, Аб'яднаная грамадзянская партыя, рух „За Свабоду”, Беларуская сацыял-дэмакратычная партыя (Грамада), Беларуская партыя „Зялёныя”, аргкамітэты па стварэньні БХД, Партыі працоўных і партыі „Надзея”, а таксама грамадзянская кампанія „Наш дом”. Прадстаўнікі гэтых сіл 30 студзеня падалі ў Менгарвыканкам заяўку на правядзеньне вулічнага мерапрыемства.

Арганізатары акцыі просяць дазволіць шэсьце ад будынка Нацыянальнай акадэміі навук да плошчы Бангалор. Марш плянуецца правесьці пад лёзунгамі адмовы ад выплаты збору згодна з дэкрэтам „аб дармаедзтве”. Дэкрэт абавязвае грамадзян Беларусі, замежных грамадзян і асоб без грамадзянства, якія пастаянна жывуць на тэрыторыі краіны й не ўдзельнічалі ў фінансаваньні дзяржаўных расходаў або ўдзельнічалі ў такім фінансаваньні менш як 183 каляндарныя дні ў мінулым годзе, выплачваць збор у 20 базавых велічынь (зараз гэта 460 рублёў).

belapan.com/аз