Адначасова ў Польшчы няма пагрозы, што крамы будуць зачыненыя ў кожную нядзелю.
Законапраект падрыхтаваў прафсаюз «Салідарнасьць» (NSZZ «Solidarność»).
У ім прапаноўваецца ўвесьці забарону працы ў нядзелю для бальшыні гандлёвых цэнтраў і крамаў, аднак зь некаторымі выключэньнямі.
Грамадзянскім законапраектам прапаноўваецца дазволіць гандаль у дзьве нядзелі запар перад Раством, у апошнюю нядзелю перад Вялікаднем, у апошнюю нядзелю студзеня, чэрвеня, жніўня і першую нядзелю ліпеня. Прафсаюз лічыць, што на Каляды, 24 сьнежня, і Вялікую суботу перад Вялікаднем гандлёвыя цэнтры павінны працаваць да 14 гадзіны.
Паводле законапраекту «Салідарнасьці», гандаль у кожную нядзелю дазваляецца малым крамам, дзе за прылаўкам стаіць уладальнік, малым заправачным станцыям, аптэкам, крамам з сувэнірамі, крамам з кветкамі, рэстаранам, барам, хлебабулачным заводам.
Прафсаюз дамагаецца таксама штрафаў або пазбаўленьня волі нават да двух гадоў за парушэньне забароны гандлю. Урад аднак не падтрымаў апошнюю прапанову. Прэс-служба прафсаюза «Салідарнасьць» заявіла, што ня будзе адстойваць пакараньня ў выглядзе турэмнага зьняволеньня.
Агулам, урад партыі «Права і справядлівасьць» рэкамэндуе працягнуць распрацоўку гэтага законапраекта, хаця ўносіць некаторыя свае заўвагі й пытаньні, – зазначае прэс-сакратар ураду Рафаль Бахэнэк (Rafał Bochenek).
Р.Бахэнэк: Ці забаронай павінен быць ахоплены онлайн-гандаль (урад лічыць, што не), аўтаматы для продажу кавы, напояў, салодкага і г.д (таксама ўрад лічыць, што не). Ці забарона павінна распаўсюджвацца на некаторыя суб’екты гаспадараньня, як напрыклад Польская пошта (Poczta Polska)? Урад за тое, каб пошта была выключана з забароны, бо гэта прывядзе да паралічу найважнейшых дзяржаўных установаў.
Рафал Бахэнэк зазначыў, што ўрад не гатовы ацаніць эканамічны кошт прапановы прафсаюзу «Салідарнасьць», паколькі законапраект забароны гандлю ў нядзелю ў Польшчы яшчэ распрацоўваецца.
Анджэй Марʼя Фаліньскі з Польскай арганізацыі гандлю (Polska Organizacja Handlu i Dystrybucji) мяркуе, што свабодныя нядзелі могуць прывесьці да звальненьня 100 тысяч супрацоўнікаў гандлю.
Паводле эканамістаў, забарона гандлю ў нядзелю можа абысьціся польскай эканоміцы ў 1 мільярд злотых ($250 млн) у дзень, а гэта больш за 50 мільярдаў злотых ($12,5 мільярдаў) у год.
Паводле сацапытаньняў, больш чым 60 адсоткаў палякаў падтрымліваюць ідэю забароны гандлю ў нядзелю.
яс
Эфірны выпуск перадачы "Пульс польскай эканомікі" ў далучаным файле