ЭК абавязала Летуву заплаціць 28 млн эўра кампэнсацыі Orlen Летува

Акцыі PKN Orlen пайшлі ўверх на Варшаўскай біржы каштоўных папераў.

Экспэрты ня маюць сумневаў, што гэта вынік штрафу, які Летува мусіць заплаціць польскаму НПЗ з Плоцка.

Эўрапейская камісія абавязала Летуву заплаціць 28 мільёнаў эўра кампэнсацыі заводу Orlen Летува ў Мажэйках, які ў 100 працэнтах належыць польскаму інвэстару. Такім чынам Брусэль пакараў летувіскую чыгунку за ліквідацыю 19 кілямэтраў рэек і нанясеньне шкоды кампаніі Orlen. У выніку кампанія была вымушана шукаць альтэрнатыўны шлях у порт у Клайпэдзе.

Брусэль тлумачыць, што такім чынам Летува парушыла правілы аб канкурэнцыі. Чыгуначная кампанія ў Летуве належыць дзяржаве.

Справа тычыцца ліквідацыі часткі чыгуначнага шляху, які злучаў Летуву й Латвію. Эўракамісія зазначыла, што рашэньне летувіскага боку заставіла аднаго з найбуйнейшых камэрцыйных кліентаў летувіскай чыгункі выкарыстоўваць значна даўжэйшы шлях для перавозкі грузаў у Латвію. «Летувіская чыгунка мэтанакіравана выкарыстала той факт, што яна зьяўляецца манапалістам у чыгуначнай інфраструктуры, і такім чынам імкнулася пашкодзіць кампаніі Orlen», - напісала камісар па пытаньнях канкурэнцыі Маргрэт Вэстагер (Margrethe Vestager). Яна падкрэсьліла, што Эўрапейскаму Зьвязу патрэбны спраўны рынак чыгуначных грузавых перавозак. «Дзейнасьць кампаніі, зьвязаная з разборкай грамадзкай чыгуначнай інфраструктуры, з мэтай зарабіць на гэтым, зьяўляецца недапушчальнай і беспрэцэдэнтнай», – дадала камісар ЭЗ.

Летувіскае Міністэрства транспарту паведаміла, што Летува будзе выкарыстоўваць усе сродкі, каб абараніць свае інтарэсы.

Польская нафтаперапрацоўчая капанія Orlen падала скаргу на Летуву ў 2008 годзе. Эўрапейская камісія ўзбудзіла справу чатыры гады таму.

За 11 гадоў польская кампанія PKN Orlen інвэставала ў Orlen Летува 4 мільярды даляраў.

яс

Эфірны выпуск перадачы "Пульс польскай эканомікі" ў далучаным файле