ААН расьсьледуе паведамленьні аб пахаваньнях пад Данецкам

Маніторынгавая місія Ўпраўленьня вярхоўнага камісара ААН па правах чалавека (УВКПЧ) ва Ўкраіне вырашыла правесьці расьсьледаваньне паведамленьняў аб масавых пахаваньнях пад Данецкам. Пра гэта паведамляе ИТАР-ТАСС са спасылкай на прэс-сакратара УВКПЧ Равіна Шамдасані.

«Няяснымі застаюцца вялікая колькасьць пытаньняў - хто адказны за гэта, колькі дакладна целаў. Нашая каманда плянуе правесьці расьсьледаваньне», - заявіла Шамдасані.

Прэм'ер-міністар самаабвешчанай Данецкай народнай рэспублікі (ДНР) Аляксандар Захарчанка заявіў, што каля 40 целаў мірных жыхароў былі знойдзеныя ў трох брацкіх магілах пад Данецкам. Паводле яго слоў, дакладная колькасьць брацкіх магіл пакуль невядомая. У адным з трох знойдзеных пахаваньняў ляжаць целы мірных жыхароў, а ў двух іншых - целы палонных апалчэнцаў і ўкраінскіх салдат.

24 верасьня факт пахаваньняў у шахце «Камунарскай» каля пасёлка Ніжняя Крынка пацьвердзілі супрацоўнікі місіі АБСЭ.

эб/lenta.ru