Аднак афіцыйны Кіеў уласнымі дзеяньнямі або хутчэй бязьдзеяньнем пачынае пацьвярджаць гэтую крытыку. Яскравы прыклад – антытэрарыстычныя апэрацыя на ўсходзе Ўкраіны.
Незадаволенасьць дзеяньнямі ўкраінскіх ўладаў на ўсходзе прывяла да таго, што людзі ў Кіеве зноў выйшлі на Майдан. Яны пікетавалі Вярхоўную раду ды дамагаліся адстаўкі цяперашніх кіраўнікоў. Прычына – няздольнасьць стрымаць хвалю сэпаратызму на ўсходзе. Паводле апошніх паведамленьняў з Данецку, сэпаратысты ўмацоўваюць свае пазыцыі, а антытэрарыстычнай апэрацыі няма. Так апісвае сытуацыю ў Данбасе аналітык Польскага інстытуту міжнародных адносінаў Яўген Вераб’ёў.
Яўген Вераб’ёў: Расейцы спынілі пакуль свой наступ у Данбасе. Яны ўмацоўваюцца ў захопленых месцах ды глядзяць за далейшым разьвіцьцём падзеяў. Турчынаў абвясьціў антытэрарыстычную апэрацыю. Але Кіеў пакуль нічога так і не зрабіў, яны пакуль пачалі канцэнтраваць войскі.
Іншыя польскія экспэрты пачалі адкрыта казаць пра тое, што абвешчаная антытэрарыстычная апэрацыя мае мала шанцаў на посьпех. Украінскія ўлады проста ня маюць структур, якія маглі б стрымаць сэпаратыстаў. Гаворыць Конрад Заштаўт з Польскага інстытуту міжнародных адносінаў.
Конрад Заштаўт: Дзеяньні Ўкраіны тут вельмі неэфэктыўныя, яны больш кампраметуюць украінскія ўлады. З выходных цягнецца эскаляцыя дзеяньняў сэпаратыстаў на ўсходзе. Толькі ў Харкаве сытуацыя здаецца апанаванай, у Данбасе ўсё вельмі небясьпечна. Украінскія ўлады не даюць з гэтым рады. Мне здаецца, што адпаведныя службы, якія маглі б з гэтым справіцца (між іншым сумнавядомы Беркут, які змагаўся з пратэстоўцамі на Майдане), цяпер зьнішчаны. Ва Ўкраіне не засталося структур, якія далі б сабе рады ў гэтай сытуацыі.
Украінская вайсковая моц існуе толькі на паперы, зазначае Войцех Лучак з часопіса “Войска-тэхніка-абарона”.
Войцех Лучак: Там склалася такая сытуацыя, што сусед ідзе на суседа. Адзін выступае за Ўкраіну, гаворыць па-расейску. Другі таксама расейскамоўны, але падтрымлівае Пуціна. Невядома, ці яны паслухаюць загады з Кіева.
Разьвіцьцё падзей толькі пацьвярджае гэтыя ацэнкі, зазначае намесьнік кіраўніка Цэнтра ўсходніх дасьледаваньняў Адам Эбэрхард.
Адам Эбэрхард: Гэтая сытуацыя паказала слабасьць Кіева, які ня ў стане ня толькі перамагчы сэпаратыстаў, але нават абмежаваць іх актыўнасьці.
Праблема ў кіеўскіх уладаў - больш псыхалягічнага характару, чым структурнага, мяркуе менскі палітоляг Андрэй Фёдараў.
Андрэй Фёдараў: Відавочна, што сёньня Ўкраіна нямоцная. Але я думаю, што сілаў для падаўленьня сэпаратысцкіх выступленьняў у іх бы хапіла. Справа ня столькі ў адсутнасьці сілаў, колькі ў тым, што яны баяцца рэакцыі Расеі. Масква толькі й чакае на тое, што там адбудзецца кровапраліцьцё, каб увесьці туды свае войскі. Змагацца з Расеяй у Ўкраіны сёньня ніяк ня хопіць сілаў.
На ўсходзе Ўкраіны шырацца сэпаратысцкія настроі, а ўрад у Кіеве ня можа іх утаймаваць. Краіна балянсуе на мяжы распаду.
Юры Ліхтаровіч