Logo Polskiego Radia
Print

Польскія гарады сярод сотні найлепшых у сьвеце

PR dla Zagranicy
Anna Zadrożna 20.03.2017 15:56
Кансалтынгавая фірма Mercer прадставіла свой штогадовы рэйтынг найлепшых для жыцьця гарадоў сьвету.
flickr.com/Kamil Porembiński

Вена нязьменна застаецца самым лепшым горадам па якасьці жыцьця. Варшава апынулася на тым жа месцы, што й Вільня, а Ўроцлаў закрывае першую сотню. Два польскія гарады апынуліся ў рэйтынгу найлепшых гарадоў для жыцьця, паводле рэйтынгу кансалтынгавай фірмы Mercer.

Паводле справаздачы, нязьменна найлепш жывецца ў Вене. Сталіца Аўстрыі перамагла ў восьмы раз запар. На другім месцы апынуўся Цюрых, на трэцім Окленд, чытаем у выданьні „Puls Biznesu”.

У рэйтынгу дамінуе Эўропа. У Топ-10 увайшло восем гарадоў Старога кантынэнта, у тым ліку тры нямецкія гарады, то бок Мюнхен, Дзюсэльдорф і Франкфурт. У Цэнтральнай Эўропе найлепшую пазыцыю заняла Прага, то бок 69-е месца, далей Любляна - 76 і Будапэшт - 78.

Варшава падзяляе 81 месца зь Вільняй. Гэта на дзьве пазыцыі горш у параўнаньні зь леташнім рэйтынгам. У сваю чаргу месца Ўроцлава панізілася на адзін пункт, то бок на 100 месца з 99 у мінулым годзе. У якасьці суцяшэньня можна згадаць факт, што Ўроцлаў апярэдзіў у рэйтынгу Шанхай.

Кампанія Mercer ацэньвае ўмовы жыцьця ў больш чым 450 гарадах па ўсім сьвеце й бярэ пад увагу 39 фактараў.

Аналітыкі правяраюць, між іншым, палітычную стабільнасьць, маштаб злачынстваў, узровень банкаўскіх паслуг, абмежаваньне асабістай свабоды, забруджваньне паветра, мэдыцынскія паслугі, магчымасьці набыцьця жыльля, узровень адукацыі, а таксама інфраструктуру, якая зьяўляецца адным з найбольш важных фактараў, чытаем у выданьні „Puls Biznesu”.

аз

Print
Copyright © Polskie Radio S.A Пра нас Кантакт