Эўразьвяз спрабуе прымусіць чыгунку быць пунктуальнай

Пасажыры атрымаюць большыя кампэнсацыі за спозьненыя цягнік. Зь іншага боку нельга выключыць магчымасьці, што чыгунка «расьцягне» час руху цягнікоў, каб не плаціць грошай. У выніку пасажырскія склады будуць ісьці даўжэй, але ня будуць спазьняцца, паведамляе Dziennik Gazeta Prawna.

Пасьля ўвядзеньня новых правіл пасажыр атрымае поўны кошт за квіток, калі цягнік спозьніцца больш чым на 2 гадзіны. Чыгунка будзе вымушаная заплаціць за кожнае спазьненьне, даўжэйшае за адну гадзіну. «Мы імкнёмся, каб пасажыры чыгункі карысталіся падобнымі правамі, як пасажыры авіякампаній», – сказала польская эўрадэпутатка Альжбета Лукаціеўска. Новыя правілы павінен прыняць Эўрапарлямэнт і краіны-чальцы ЭЗ.

Калі б новыя правілы былі ўведзеныя сёньня, то найбольшыя кампэнсацыі плаціла б польская дзяржаўная чыгуначная кампанія экспрэсаў і хуткіх цягнікоў PKP Intercity. У другой палове гэтага году траціна пасажырскіх складаў кампаніі спазьнілася.

Экспэрты мяркуюць, што чыгуначныя перавозчыкі будуць даваць большы запас часу на сьледаваньне цягнікоў з той мэтай, каб пазьбягаць кампэнсацый. У выніку цягнік па раскладу будзе ісьці даўжэй, чым на гэта дазвалялі б тэхнічныя магчымасьці.

яс