У Нацыянальным мастацкім музэі Рэспублікі Беларусь у Менску да 17 сакавіка працуе выстаўка «Адкрыцьцё сапраўднага», прымеркаваная да 80-годзьдзя музэя. І што цікава — яна стала вынікам у тым ліку супрацоўніцтва з польскімі мастацтвазнаўцамі.
Выстаўка «Адкрыцьцё сапраўднага» ў Нацыянальным мастацкім музэі Рэспублікі Беларусь дэманструе вынікі карпатлівай працы рэстаўратараў.
На працягу некалькіх гадоў калектыў, які складаецца з 26 чалавек, вярнуў першапачатковы выгляд больш як 60 прадметам старажытнага мастацтва Беларусі. Да стварэньня некаторых зь іх маюць дачыненьне ў тым ліку польскія майстры. Многія з твораў зьявіліся, калі Беларусь і Польшча складалі адну дзяржаву — Рэч Паспалітую.
Асаблівую ўвагу на выстаўцы прыцягвае партрэт Януша Радзівіла, гетмана польнага і вялікага гетмана ВКЛ, віленскага ваяводы. Ён пражыў усяго 43 гады — у першай палове XVII ст. Нарадзіўся ў мястэчку Папіліс (Papilỹs), пад Біржай (Bìržai), на поўначы сучаснай Літвы, а памёр ў Тыкоціне, пад Беластокам, на ўсходзе цяперашняй Польшчы.
Яго партрэт захаваўся ў Нясьвіскім замку, адкуль пасьля 1939 года трапіў у менскі мастацкі музэй. Але толькі цяпер зьявілася магчымасьць убачыць яго ў арыгінальным выглядзе — якім ён быў пры жыцьці Януша Радзівіла. Гэта стала вынікам працы рэстаўратараў на чале з рэстаўратарам вышэйшай катэгорыі Аркадзем Самуілавічам Шпунтам, загадчыка аддзела навукова-рэстаўрацыйных майстэрань Нацыянальнага мастацкага музэя Рэспублікі Беларусь.
Аркадзь Самуілавіч расказаў пра незвычайную гісторыю партрэта, які рэстаўрыравалі ў ХХ ст. ленінградзкія спэцыялісты, а працягу апошніх двух гадоў менскія. Пры гэтым менскія адкрылі невядомыя раней дэталі, напісаныя яшчэ ў XVII ст.
Лічыцца, што аўтарам партрэта зьяўляецца мастак з Гданьска Даніэль Шульц. Гэту здагадку пацьвердзілі рэстаўратары з Гданьска, якія прыяжджалі ў Менск і аглядалі партрэт.
Аркадзь Шпунт мяркуе, што Шульц пісаў Радзівіла з натуры, прынамсі, дакладна рабіў накід яго партрэта з самога Януша Радзівіла, а пасьля мог выкарыстоўваць манэкен для маляваньня дэталей адзеньня магната.
Аркадзь Шпунт
Фота: архіў Аркадзя Шпунта
Аркадзь Шпунт запрашае наведаць выстаўку адрэстаўрыраваных твораў у Нацыянальным мастацкім музэі Рэспублікі Беларусь, на якой ёсьць унікальная магчымасць на свае вочы ўбачыць карціны, абразы, скульптуры ў тым ліку пэрыяду Рэчы Паспалітай. Многія з гэтых рэчаў дзесяцігодзьдзямі былі схаваны ад вачэй людзей у фондах музэя.
Віктар Корбут
Слухайце далучаны гукавы файл