У Лёндане асьвецяць нарожны камень беларускай царквы
PR dla Zagranicy
Alena Vialichka
06.02.2016 08:07
Гэта будзе першая беларуская каталіцкая царква за межамі Беларусі.
фота з профіля айца С. Стасевіча на Фэйсбуку
7 лютага ў Лёндане будзе асьвечаны нарожны камень царквы сьвятога Кірылы Тураўскага і Ўсіх сьвятых заступнікаў беларускага народа. Ва ўрачыстасьці прымуць удзел Апостальскі Нунцый у Вялікабрытаніі арцыбіскуп Антоніё Мэніні й герарх Украінскай каталіцкай эпархіі Сьвятой Сямʼі ў Лёндане Глеб Ланчына.
Беларуская царква будзе пабудавана з драўніны. Яна будзе першай драўлянай царквой у горадзе з часоў вялікага лёнданскага пажару 1666 году. Гэта таксама першая ў гісторыі беларуская каталіцкая царква за межамі Беларусі.
Беларуская царква ў Вялікабрытаніі існуе з 1947 году. Але ніколі не было царкоўнага будынку. Будаўніцтва царквы сьвятога Кірылы Тураўскага і Ўсіх сьвятых заступнікаў беларускага народа будзе завершана ў лістападзе бягучага года.
Душпастыр каталікоў у Лёндане айцец Сяргей Стасевіч адзначае, што царква ў брытанскай сталіцы гэта нешта большае, чым толькі рэлігійная ўстанова. Вакол царквы вядзецца шырокае грамадзкае жыцьцё.
С. Стасевіч: У будынку культурна-рэлігійнага цэнтра Marian House ў нас адбываюцца разнастайныя мерапрыемствы. У нас ёсьць нядзельная школа для дзяцей, курсы беларускай мовы для замежнікаў. Царква ў Вялікабрытаніі займаецца больш шырокай дзейнасьцю на карысьць ведаў пра Беларусь у тутэйшым грамадзтве, каб яно даведалася пра нас больш. Царква будуецца фактычна з гэтай мэтай.
Стварыў праект царквы малады лёнданскі архітэктар кітайскага паходжаньня Цзыўай Рафаэль Со, які зьяўляецца грэка-каталіком і цікавіцца беларускай архітэктурай.
Мерапрыемства адбудзецца 7 лютага ў 10.30 па адрасе: Marian House, Holden Avenue, London, N12 8HY.
Поўную гутарку з айцом Сяргеем Стасевічам слухайце ў далучаным гукавым файле.
ав