На гэтым тыдні экалягічныя актывісты арганізацыі «Грынпіс» выкарысталі радыкальную форму пратэсту супраць зьнішчэньня Белавескай пушчы. А гэта, паводле іх, робіць урад у асобе міністра навакольнага асяродзьдзя Яна Шышкі.
А 9 раніцы ў аўторак, 12 красавіка, актывісты залезьлі на дах міністэрства навакольнага асяродзьдзя Польшчы. Па-першае, яны вывесілі на будынку агромністы транспарант «Цэлая Белавеская пушча – нацыянальным паркам». Па-другое, актывісты заявілі, што застануцца на даху будынку столькі, колькі трэба для таго, каб пачуць ад ураду абяцаньні аховы пушчы.
У двух словах канфлікт эколягаў і ўраду можна апісаць наступным чынам. Апошнія месяцы трывае вострая дыскусія паміж эколягамі й прадстаўнікамі ўраду. Першыя пераконваюць, што чалавек не павінен умешвацца ў жыцьцё Белавескай пушчы. У сваю чаргу міністэрства навакольнага асяродзьдзя павялічыла вырубку дрэваў у гэтым лясным масіве ў сувязі з захворваньнем дрэваў, якія атакуе караед. 1/3 пушчанскіх лясьніцтваў застанецца без умяшальніцтва чалавека. На тэрыторыі 2/3 будзе весьціся лясная гаспадарка.
«Грынпіс» патрабуе ахапіць цэлую Белавескую пушчу аховаю, а гэта значыць прызнаць яе нацыянальным паркам – кажа дырэктар польскага «Грынпісу» Робэрт Цыгліцкі. Адначасова ён адзначае, што яны прапануюць вярнуцца да праекту, які быў прапанаваны некалькі гадоў таму прэзыдэнтам Лехам Качыньскім.
Р. Цыгліцкі: Мы лічым, што гэта апошні момант, калі польскі ўрад мае шанец пазьбегнуць міжнароднай кампрамэтацыі. Таксама мы знаходзімся тут, каб задаць пытаньне прэм’еру Бэаце Шыдла й старшыні кіроўнай партыі Яраславу Качыньскаму, ці яны падтрымаюць ідэю Леха Качыньскага. Ідэю пакліканьня нацыянальнага парку на тэрыторыі ўсёй Белавескай пушчы.
Міністар навакольнага асяродзьдзя Ян Шышка на скліканай прэс-канфэрэнцыі запрасіў эколягаў на размову, але ў Белавежу, мясцовасьць у Белавескай пушчы. Міністар нагадаў, што ён распачаўся плян адбудовы пушчы, дзе пануе эпідэмія караедаў.
Я. Шышка: Я запрашаю асобы з «Грынпісу», якія цяпер знаходзяцца на даху будынка міністэрства, да дыскусіі пра пушчу ў пушчы. Дадзеныя аб вымерлых дрэвах павінны быць асновай для дыскусіі.
Міністар Ян Шышка ня раз адзначаў, што Белавеская пушча па віне папярэдніх уладаў занядбаная. Гаворка, між іншым, пра тое, што ў лясным масіве ляжыць 3,5 млн мёртвых дрэваў.
Богдан Пэнкацкі з «Грынпісу» кажа, што яны спрабавалі сустрэцца з чыноўнікамі са сьнежня. Цяпер яны хочуць размаўляць з прэм’ер-міністрам Бэатай Шыдла.
Б. Пэнкацкі: Міністар Ян Шышка зрабіў ужо ўсе, што мог. І зрабіў вельмі кепскія рэчы.
У першы дзень пратэсту на даху будынку знаходзілася 16 чалавек, якія былі падрыхтаваныя, каб правесьці там ноч. Яны мелі спальнікі й запас ежы.
Пасьля зьмярканьня эколягі высьвятлялі на будынку здымкі. Марыянна Гашоўска кажа, што здымкі яны атрымалі ад карыстальнікаў інтэрнэту.
М. Гашоўска: Цэлы дзень мы заахвочвалі асобы, якім не абыякавы лёс пушчы, выказваць сваю падтрымку пушчы й нашым актывістам, высылаючы свае здымкі з карткаю, на якой яны падтрымліваюць нашу прапанову зрабіць цэлую пушчу нацыянальным паркам, ці з хэштэгам «Я люблю пушчу». У сацыяльных сетках мы атрымалі мноства такіх здымкаў. Водгук быў фантастычны. Мы будзем высьвятляць гэтыя здымкі на нашым транспаранце, даючы гэтым асобам шанец быць разам з намі.
Агулам актывісты правялі дзьве ночы на даху будынку міністэрства навакольнага асяродзьдзя. Свой пратэст яны завяршылі ў чацьвер. Эколягі патлумачылі, што гэта не канец кампаніі на карысьць Белавескай пушчы. Гэта канец толькі адной акцыі. Вядома, што заклік эколягаў рэалізаваць прапанову Леха Качыньскага трапіў да прэм’ера Бэаты Шыдла й брата былога прэзыдэнта Яраслава Качыньскага. Але яны не сустрэліся з актывістамі й ня выказалі свайго меркаваньня.
Для «Грынпісу» гэта знак, што яны пакінулі лёс пушчы ў руках міністра навакольнага асяродзьдзя Яна Шышкі. «Мы ўспрымаем гэта як маўклівую згоду на зьнішчэньне нашай прыроднай спадчыны», – казаў Робэрт Цыгліцкі.
Міністар пасьлядоўна паўтарае, што павялічыў вырубку дрэваў у сувязі з неабходнасьцю абароны пушчы ад караедаў. Ян Шышка нагадвае, што ў выніку эпідэміі гэтых насякомых вымерлі дзясяткі мільёнаў дрэў.
Калі акцыя на даху будынку міністэрства завяршылася, паліцыя аштрафавала яе ўдзельнікаў. 15 чалавек атрымалі штраф памерам 500 злотых (120 даляраў) за парушэньне правапарадку.
ав