Грамадзянін Польшчы затрыманы за хабарніцтва ва Ўкраіне

Грамадзянін Польшчы затрыманы за хабарніцтва ва Ўкраіне. Паводле генэральнага пракурора Юрыя Луцэнкі, гаворка вядзецца пра высокапастаўленага прадстаўніка дзяржаўнай чыгункі «Укрзалізниця». Пра гэта паведамляе сёньня інтэрнэт-партал onet.pl. З матэрыялу вынікае, што чыноўнік трапіў у рукі праваахоўных органаў, калі прымаў 70 тысячаў даляраў.

Спэцапэрацыя прайшла ў адным з рэстаранаў Кіева. Па словах Луцэнкі, затрыманы – гэта першы намесьнік начальніка дэпартамэнту аўдыту ды кантролю кампаніі Вахтангі Джакелі. Ён нарадзіўся ў Грузіі й нейкі час жыў у Польшчы. Як напісаў на сваёй старонцы ў Фэйсбуку намесьнік міністра інфраструктуры Ўкраіны Юры Лаўранюк, 70 тысячаў – гэта толькі першая частка хабару. Агульная ж сума – 300 тысячаў даляраў.

Папярэдні кіраўнік дзяржаўнага перавозчыка Войцех Бальчун заявіў журналістам, што ня ведаў нічога на гэты конт, але цягам апошніх месяцаў багата чуў пра падрыхтоўку правакацыяў. У выніку мэнэджэр прыняў рашэньне аб адстаўцы. У жніўні ўкраінскі прэм’ер Уладзімер Гройсман казаў, што паляк пакінуў пасаду па ўласным жаданьні і з асабістых прычынаў. Партал нагадвае – Бальчун кіраваў кампаніяй з красавіка 2016, калі выйграў конкурс, у якім бралі ўдзел каля 30 кандыдатаў.

Пасьля году працы мэдыі хвалілі яго за рацыянальнае распараджэньне фінансамі і арганізацыю новых маршрутаў. Разам з тым, Бальчуна крытыкаваў міністар інфраструктуры Ўладзімер Амелян. Да яго далучыўся таксама пракурор Луцэнка, які папракаў мэнэджэра ў неэфэктыўнай барацьбе з карупцыяй унутры кампаніі, паведамляе Onet.pl.

св