Польшча падрыхтавала найбуйнейшы стэнд сярод усіх краін Эўрапейскага Зьвязу на Міжнародны Кірмаш Імпарту Кітая. Мерапрыемства ладзіцца ўпершыню й праходзіць у Шанхаі.
У польскім павільёне выставілі свае тавары 82 прадпрыемствы, – паведамляе карэспандэнт Польскага радыё ў Пэкіне Тамаш Саевіч.
Т.Саевіч: На кірмаш у Шанхай прыехалі кампаніі, якія хочуць прадаваць у Кітай польскія прадукты харчаваньня, папулярныя ў Паднябеснай вырабы з янтаром, а таксама фірмы з сэктара новых тэхналёгій.
Тамаш Пісуля, старшыня Польскага агенцтва інвэстыцый і гандлю, якое зьяўляецца галоўным арганізатарам польскай гандлёвай місіі ў Шанхаі, лічыць, што ўдзел у кірмашы зьяўляецца шанцам для польскіх прадпрыемстваў знайсьці партнэраў у Кітаі.
Т.Пісуля: Я думаю, што мы выбралі кампаніі зь вялікім экспартным патэнцыялам, якія вырабляюць тавары вельмі высокай якасьці. Паводле нас, кітайскі рынак лепш заваёўваць якасьцю, чым цаной.
Кітай заяўляе пра намер павялічыць імпарт, у прыватнасьці з дзяржаваў, разьмешчаных на новым шоўкавым шляху.
З двух мільёнаў кампаній, зарэгістраваных у Польшчы, толькі 17 тысяч займаюцца экспартам. Польскія кампаніі экспартуюць пераважна ў эўрапейскія краіны. Найбольш, бо амаль 30 адсоткаў усяго польскага экспарту паступае ў Нямеччыну.
Намесьнік міністра прадпрымальніцтва і тэхналёгій Тадэвуш Касьціньскі (Tadeusz Kościński) заклікае польскіх вытворцаў выйсьці з экспартам за межы ЭЗ.
Т.Касьціньскі: Нам трэба заахвоціць польскіх прадпрымальнікаў пацікавіцца новымі рынкамі звонку Эўразьвязу. Адзін мільярд 400 мільёнаў людзей у Кітаі зьяўляецца аграмадным рынкам. Мы таксама хочам паказаць кітайскім уладам, што Польшча вельмі сур'ёзна ставіцца да супрацоўніцтва з Кітаем. Вядома, у нас ёсьць вялікі імпарт з Кітая – $ 27 млрд, і толькі 2-3 млрд у экспарце. Мы хочам, каб кітайскі бок адчыніў нам свае дзьверы.
Міжнародны кірмаш імпарту ў Шанхаі зьяўляецца першым гэтага віду мерапрыемствам, зладжаным пад патранатам кітайскага ўраду. Прымаюць у ім удзел прадпрымальнікі з больш чым 140 дзяржаваў.
Мерапрыемства працягнецца да суботы.
Эфірны выпуск перадачы Пульс польскай эканомікі ў далучаным файле