23.07.1792 г. кароль далучыўся да Таргавіцы

23 ліпеня 1792 году кароль Рэчы Паспалітай Станіслаў Аўгуст Панятоўскі далучыўся да Таргавіцкай канфэдэрацыі.

Таргавіцкая канфэдэрацыя ўзьнікла пры актыўным садзеяньні Расеі, якая была незадаволена сацыяльна-эканамічнымі q палітычнымі рэформамі ў Рэчы Паспалітай, а таксама прыняцьцем Канстытуцыі 3 траўня 1791 году. Зьмены маглі паспрыяць кансалідацыі ўлады ў Рэчы Паспалітай і не дазволіць на далейшае зьнішчэньне польскай дзяржавы.

Таргавіцкая канфэдэрацыя, якая складалася з прадстаўнікоў польска-літоўскай шляхты й магнатаў, заяўляла пра парушэньне свабодаў і правоў шляхты й пра дзяржаўны пераварот.

Фактычна гэта быў адзін з прыкладаў «гібрыднай вайны» у ХVIII стагодзьдзі, якую вяла Расейская Імпэрыя ў дачыненьні да Рэчы Паспалітай). Сябры канфэдэрацыі бачылі ў Расеі гаранта традыцыйных свабодаў і абаронцу інтарэсаў Рэчы Паспалітай.

Дзеяньні гэтай канфэдэрацыі сталі глебай да вайны з Расеяй і далейшага зьнішчэньня Рэчы Паспалітай.

У траўні 1792 году распачаліся поўнамаштабныя вайсковыя дзеяньні. Вельмі хутка Аўгуст Панятоўскі зразумеў, што ён знайшоўся ў вельмі нязручнай для сябе сытуацыі. І пачаў шукаць магчымасьці як прымірыцца з Кацярынай ІІ.

Прычынай такіх дзеяньняў было ня толькі тое, што Прусія вырашыла не дапамагаць Рэчы Паспалітай у вайне з Расеяй, але тое, што кароль пазычыў у Расеі вялікія сумы грошай, і менавіта гэтым быў шантажаваны.

Кацярына ІІ запатрабавала, каб кароль далучыўся да Таргавіцкай канфэдэрацыі.

І ён гэта зрабіў 23 ліпеня 1792 году. Панятоўскі тлумачыў, што ён імкнецца абараніць цэласнасьць краіны.

Рашэньне караля, хоць і прыпыніла вайну, але прадумовіла далейшае зьнішчэньне краіны. Амаль праз год адбыўся другі падзел Рэчы Паспалітай.

Павал Усаў