Прэмія для паляка за назіраньне за плянэтамі

Гэта адна з найбольш прэстыжных навуковых ўзнагарод у сьвеце. Яе ўручае ўнівэрсытэт у Тэль-Авіве і Фонд Dany Davida за "пераломнае адкрыцьцё для сучаснага сьвету".

Прафэсар Удальскі ўзнагароджаны за ўнёсак у разьвіцьцё новай галіны астранамічных дасьледаваньняў – вялікамаштабных назіраньняў неба ў доўгіх прамежках часу. Разам з польскім вучоным прэмію ўручылі яшчэ двум амэрыканскім вучоным. Ляўрэаты да падзелу атрымалі адзін мільён даляраў.

Анджэй Удальскі зьяўляецца сааўтарам буйнейшага ў гісторыі польскай астраноміі праекту «OGLE» (The Optical Gravitational Lensing Experiment), які пастаянна прыносіць навуковыя вынаходніцтвы вышэйшага сусьветнага рангу.

Прафэсар зьяўляецца таксама аўтарам сучасных відэакамэр, якія дапамагаюць дакладна назіраць за вялікімі плошчамі неба. Ён таксама прымаў удзел у будаўніцтве Польскага тэлескопа ў абсэрваторыі Las Campanas у Чылі.

Падчас дасьледаваньняў у рамках праекту OGLE дасягнуты прарыў у галіне назіраньня за пазасонечнымі плянэтамі. Польскі вучоны прычыніўся да адкрыцьця звыш дзесяці плянэт, якія кружаць вакол іншых зорак.

Rzeczpospolita/яс