Сёньня, паважаныя радыёслухачы, у кулінарнай рубрыцы “Лыжка й відэлец” прыгатуем традыцыйную польскую страву. А называецца яна бігас. Хоць бігас, варта адзначыць, сустракаецца таксама ў летувіскай, польскай, а таксама іншых кухнях.
Дык што такое бігас? Гэта традыцыйная страва з квашанай капусты (як варыянт з дадаткам сьвежай) й мяса ды каўбас. Лічыцца, што назва паходзіць ад нямецкага «begossen» або «beigossen» ад дзеяслова «begießen» (абліць, паліць) і «beigießen» (даліць).
Варыянтаў бігасу вельмі шмат, можна сказаць, што незьлічоная колькасьць, у тым ліку й вэгетарыянскі. Але сёньня я вас пазнаёмлю са стравай, якую я сам асабіста раблю.
І так, на спатрэбіцца:
2,5 кг квашанай капусты
1 кг сьвежай капусты
300 г вэнджанага бэкону
500 г вэнджанай каўбасы
500-700 г сьвіной лапаткі
3 вялікія цыбулі
сушаныя грыбы – са дзьве жмені
чарнасьліў бяз костак – 10-15 штук
3-4 морквы
таматная паста
лаўровы ліст (5 лісткоў), духмяны перац (з 7 гарошын), горкі перац (з 10 гарошын), мелены горкі перац (паводле смаку), соль (паводле смаку), каля шклянкі чырвонага сухога віна (як варыянт), некалькі гарошын ядлоўца, маяран (адна лыжачка), паводле смаку прыправа тыпу “Вегета” (можна безь яе), зерне кмену (каля 2 чайных лыжачак).
І так, сьвежую капусту шаткуем, квашаную таксама, калі ёсьць такая патрэба. Кладзем у вялікую каструлю (каб добра было перамешваць), дадаем крыху вады, каб страва не прыгарэла. Капусны сок, які застаўся з квашанай капусты, таксама ўліваем у рондаль. У каструлю таксама закідваем, добра прапаласкаўшы, парэзаныя й намочаныя ў вадзе сушаныя грыбы. Гатуем на малым агні каля 40 хвілін. Пасьля гэтага дадаем палову з 3-4 моркваў, парэзаўшы на невялічкія кавалкі. Калі маркоўка тонкая, то можна напалову, і пазьней на кавалачкі шырынёй за паўсантымэтра.
У каструлю таксама дадаем палову цыбулі (1,5 галоўкі). Ну й трэба памятаць, каб час ад часу мяшаць. Капуста павінна тушыцца на малым агні.
Бярэм вялікую патэльню. Смажым парэзаны на сярэднія кавалкі бэкон. Калі тлушчу з бэкона будзе мала, то можна дадаць крыху алею. Дакладваем мяса й парэзаную на сярэднія кавалкі каўбасу. Калі мясныя рэчы пачнуць падрумяньвацца, дадаем другую частку парэзанай саломкай цыбулі й маркоўкі, патаркаванай на тарцы. Смажым на залацісты колер.
Прыкладна праз гадзіну ў каструлю дадаем зьмесьці нашай патэльні, парэзаны на палову чарнасьліў, з 2-3 лыжкі таматнай пасты, прыправы (але ўвага: трэба пільнаваць, каб быў балянс смаку!) і віно. Тушым з 7-10 хвілін. Індыкатарам гатоўнасьці будзе маркоўка, парэзаная на кавалачкі: калі яна ня будзе сырой, значыць, бігас гатовы.
Дарэчы, бігас без праблем можа стаяць у халадзільніку нават тыдзень. Кожны раз рэкамэндуецца падаграваць усю каструлю, а ня порцыямі, таму што чым больш страва падаграваецца, тым яна смачнейшая. Калі ўсё ж такі яго ня ўдасца асіліць, то праблемы няма: бігас можна падзяліць на порцыі, запакаваць у поліэтыленавыя пакецікі й замарозіць. Пасьля размарозкі ён ня траціць ані смаку, ані водару.
А падаваць бігас можна альбо проста безь нічога, толькі з хлебам, альбо са сьмятанай ці натуральным ёгуртам.
Смачна есьці!
Валеры Саўко
слухайце далучаны гукавы файл