У Бостане раздалі прэмію Антынобэля
PR dla Zagranicy
Jolanta Śmiałowska
17.09.2018 14:32
Узнагароды ўручаюцца за дасягненьні, якія «сьпярша выклікаюць сьмех».
http://www.nhpr.org/post/granite-geek-all-about-ig-nobel-prize
Лялька вуду дапамагае разгрузіць гнеў, людзкое мяса ня вельмі пажыўнае, а калёнаскапію кожны можа зрабіць сабе сам дома – гэта толькі некаторыя зь незвычайных, сьмешных або дзіўных вынікаў дасьледаваньняў, адзначаных у гэтым годзе прэміяй Антынобэля.
Ужо 28-мы раз у Гарвардзкім унівэрсытэце ў Бостане сапраўдныя ляўрэаты Нобэлеўскай прэміі ўручылі Антынобэлі (Ig Noble) – узнагарода спансуецца часопісам «Аналы неверагодных дасьледаваньняў» («Annals of Improbable Research»). Узнагароды ўручаюцца за дасягненьні, якія «сьпярша выклікаюць сьмех, а затым людзі пачынаюць думаць».
Канадзкі вучоны, спэцыяліст па пытаньні агрэсіўных паводзін на працы, правёў дасьледаваньні, у выніку якіх сьцьвердзіў, што сваю злосьць лепш не разгружаць на начальніку, а больш бясьпечна для працаўніка памучыць ляльку вуду.
Сярод ляўрэатаў сёлетніх антынобэляў ёсьць японскі лекар Акіра Хорыучы, які распрацаваў рэвалюцыйны мэтад самастойнай калёнаскапіі, а напэўна паказаў, што гэта магчыма.
Антынобэля атрымаў брытанскі археоляг Джэймс Коўл з Унівэрсытэта ў Брайтане, які, дасьледуючы зьяву канібалізму, паказаў, што людзкое мяса... ня вельмі пажыўнае.
Пераможцы, якія, як і кожны год, прыбылі ў Бостан за свой рахунак, атрымалі грашовыя прызы – 10 трыльёнаў зімбабвійскіх даляраў, ужо выключаных са звароту.
У кожнага пераможцы было 60 сэкунд на прамову з нагоды атрыманьня Антынобэля; калі час скончыўся, васьмігадовая дзяўчынка перапыняла, кажучы: «Калі ласка, спыніце. Гэта сумна».
PAP/яс